Lok Sabha Elections | लोकसभा निवडणूक निकाल: ईव्हीएम सुरक्षेच्या पारदर्शकतेवर जनतेचा विश्वास; कशी होते मत मोजणी?
Lok Sabha Elections | देशभरात नुकत्याच पार पडलेल्या ७ टप्प्यांच्या निवडणुकांनंतर आज सकाळी ८ वाजल्यापासून मतमोजणीला सुरूवात झाली आहे. देशातील नागरिकांची नजर आता १८ व्या लोकसभेच्या निकालांवर आहे. इलेक्ट्रॉनिक व्होटिंग मशिन (ईव्हीएम) च्या मदतीने मतमोजणीची प्रक्रिया जलद आणि सुलभ करण्यात आली आहे. परंतु, निवडणुकीच्या काळात काही नेत्यांनी ईव्हीएमच्या सुरक्षेबाबत प्रश्न उपस्थित केले होते. त्यामुळे मतमोजणीपूर्वी ईव्हीएममध्ये छेडछाड झाली नाही, याची खात्री कशी केली जाते? हे जाणून घेणे महत्वाचे आहे.
ईव्हीएमची मतमोजणी प्रक्रिया
१९५१ च्या लोकप्रतिनिधी कायद्याच्या कलम ६४ नुसार, मतांची मोजणी संबंधित मतदारसंघाच्या रिटर्निंग ऑफिसर (आरओ) यांच्या देखरेखीखाली केली जाते. मतमोजणी एका मोठ्या हॉलमध्ये आयोजित केली जाते, जिथे विविध टेबलांवर ईव्हीएम मशिन ठेवल्या जातात. या मशिन जिल्हा मुख्यालय किंवा आरओ मुख्यालयातील स्ट्रॉंग रूममधून आणल्या जातात.
ईव्हीएमच्या सुरक्षेची खात्री
ईव्हीएम मशिनमध्ये कोणत्याही प्रकारची छेडछाड होणार नाही, याची खात्री करण्यासाठी या मशिनची अनेक स्तरांवर तपासणी आणि सुरक्षितता केली जाते. या तपासणीमध्ये BEL/ECIL अभियंत्यांचा समावेश असतो. BEL/ECIL अभियंते राजकीय पक्षांच्या प्रतिनिधींसमोर प्रत्येक ईव्हीएम मशिनची तांत्रिक आणि भौतिक तपासणी करतात. यासाठी काही मशिनमध्ये मॉक पोल केले जातात. या काळात कोणतेही यंत्र सदोष आढळल्यास ते पुन्हा कारखान्याकडे पाठवले जाते.
